列斯失寵前鋒科拿輾轉之下將會簽約加盟曼城。之前明明講好唔走點解又轉軚？計我話科拿未必真係想走，只係為勢所迫，如果列斯賣佢唔成就唔夠錢使，到時被迫賣走活基治，所以科拿難免成為呢幕「棄卒保車」嘅一隻「卒」。當年利物浦紅極一時嘅戰將，估唔到今日慘成人球。
列斯領隊雲拿保斯講得好妙：「佢上次臨簽約唔肯去曼城，𠵱家就肯去，我諗係佢心態改變。」
科拿心態有無變得佢自己知，但自從佢唔去曼城返嚟，列斯應該一直向佢施壓，換轉你係科拿都無癮啦，結果唔想走都要走。據講列斯沽出科拿後暫時唔使再賣人，科拿都算「偉大」囉。

3R來華撲飛要早
之前一路聽見巴西將會響下個月派強陣訪華，雖然係咁，一日唔睇到正式名單始終唔能夠令人放心。不過，波友睇完我哋體育版今日報道落實來華嘅森巴大軍名單後，應該放下心頭大石啦啩。今次係中國球壇史上首次有應屆世界盃冠軍隊來訪，最緊要係要雲集3R，機會可一不可再。想睇好波嘅波友要撲飛啦。

祖記籌款節目夠溫情
意大利國家電視台噚晚播出一個特備節目，祖雲達斯職球員齊齊上電視表演，為修建兒童院籌款。屆時費拉拿會拍賣效力拿玻里時獲隊友馬拉當拿贈送嘅波鞋；戴維斯就會拍賣響比賽上用過嘅運動眼鏡。我求大俠聽得太多球會爭拗、死人同埋球場暴力事件，每次聽見球會做好事都有一絲暖意。