31歲裕美經歷過婚姻失敗，去年戀上意大利籍男友Alex，兩人經常糖黐豆在網上放閃，以為佢哋打風打唔甩；然而，日前裕美忽然在社交網暗示甩拖，出發到吉隆坡工作嘅佢寫上：「寄情工作」、「一個人也能好好過」、「Enjoying the solitude（享受孤單）」、「Lonely Christmas（寂寞聖誕節）」等hashtag，今日《蘋果》終於聯絡到裕美，佢直認已分手：「因為分隔兩地問題，我要照顧媽媽，所以要分開。」

Alex喺香港搞外語學校，點解會分隔兩地？裕美表示：「佢經常不在港，佢亦可能要決定離開香港。」問到分手幾耐？裕美表示：「都好一排，沒記得實際，但一定不止一個月了，係雙方協議分開。」有冇第三者呢？裕美強調：「冇第三者，大家都是和平解決，難過是有，不過人生經歷咗咁多，睇開咗好多，愛情好難講，我從來自己唔開心完便算。」

前年裕美被爆背老公暗交黃子恆，之後再爆出疑被家暴，結果與老公離婚兼跟黃子恆分手；今日黃子恆被爆疑搞大fans肚，裕美亦直認同老外男友分手，估唔到兩人各自陷入感情漩渦！對於舊愛黃子恆被fans指控搞大肚，裕美表示：「我唔了解，所以我不回應了。」

精選娛聞，喺晒《娛果》
http://fb.com/appledailyent