有「新保方」之稱嘅基安盧基當拿隆馬，周日意甲又有神救，主場對安玻里一戰，喺完場前4分鐘面對馬卡朗尼嘅單刀，電光火石間，近距離用右手托高對方睇嚟必入嘅射門出底線；馬卡朗尼呢腳勁力十足，同埋都叫呃咗當拿隆馬撲向另一邊，但呢位18歲後生仔就係反應夠快，咁都可以及時伸隻右手出嚟擋走個波。

雖然當拿隆馬神救，但原來只係避免輸到1:3。安玻里靠麥希里迪斯同巴巴泰安各入一球，以2:1擊敗有拿柏度拿破蛋嘅AC。如果要揀AC輸波罪人，可能就係蘇索，喺59分鐘竟然射12碼宴客。AC目前仲係累積58分，但被第5位嘅阿特蘭大拉開至5分差距，爭奪來季歐霸盃入場券唔樂觀囉。