暑假令人熱辣辣，連區議會都有惹火議題撻著咗喎！深水埗區議員聽日舉行大會，建制派同民主派都會駐重兵迎戰，皆因席間會討論民主派提出取消議員動議嘅「授權票」安排，民主派指過往不時發生議員唔在席又唔知議案情下「被投票」情況，因此要取消，民協會前據知仲會有「行動」造勢。建制亦不甘示弱，提出議員必須嚴守會議常規，若要提出臨時動議就要喺十個工作天前通知秘書。查實今次唔係民主派首次提出相關動議，今次再接再厲，形勢繼續爭持激烈，因為建制派同民主派係12票對11票，只要建制派少兩個人在席，民主派就旗開得勝。

八方問過深水埗區議員之一嘅自由黨李梓敬，佢當然舉腳贊成建制派嘅動議，話有時因事未能出席會議，或要其他議員代表態，個人認為臨時動議最大問題係議員未能事前諮詢選民意見下投票，因此覺得要揸正嚟做，但指就算建制派議案通過，都唔等於主席唔可以再用酌情權批准臨時動議嘅，只係唔好再似而家咁「老奉」要批准咁。