【失戀旅行團×蘋果(11)】Don喜見雙彩虹 Vincci玩到濕晒
彩虹旗 瀑布 emoji 前度 LGBT 雙彩虹 love 表情符號 日本 同志 愛 同性戀 失戀 東京 華嚴瀑布 失戀旅行團 日光東照宮 Rainbow Flag
Your browser does not support the video tag.
由Secret Tour × GLOs舉辦嘅失戀旅行團(BreakUp Tour)五日四夜東京之旅,請四位失戀團友Don(24歲)、Vincci(26歲)、霍哥(29歲)和Yumi(22歲)去旅行,各自散心。上集失戀團友接受了最大挑戰,打最後一通電話畀前度盡訴心底話。電話最後有冇打出唔重要,最重要係失戀旅行團令佢哋勇敢面對過去,坦誠自己,真正釋懷。喊過痛過,係時候要盡情開心玩番日!今集嚟到行程嘅最後一日,Don同Vincci去到東京兩大著名景點—「日光東照宮」及「華嚴瀑布」,喺戶外盡情呼吸大自然空氣!
好多人嚟到日本東京都係食玩買,今集介紹嘅景點絕對令你有驚喜,原來東京都有好壯觀嘅文化遺跡同大自然景色。Don同Vincci一大早就出發,因為天公造美,佢哋心情都特別靚。Vincci前一晚仲喊得好傷心,但一望到藍天白雲已經開心到彈起,「好開心呀你睇吓今朝個天,尋日係打風㗎!」適時放下心中不快,將焦點放落身邊一切美好事物,其實快樂可以好簡單。
第一站行程首先去到位於日本日光市山內嘅世界文化遺產「日光東照宮」,係一座主要祭祀江戶時代德川家康將軍嘅神社。神社內有超過五千尊雕像,必睇嘅有「想像之象」、「三猿」同「眠貓」。Vincci睇到「三猿」即刻好興奮咁介紹,「好搞笑呀,喺嗰度有三個Emoji(表情符號),有冚眼冚嘴同埋冚耳仔。」Emoji的確是源於日本,「三猿」出自「日光東照宮」,代表「不看、不言、不聽」,意思係唔好睇、唔好講、唔好聽唔好嘅嘢同人哋嘅過失。
去到寺廟,Vincci求咗支籤,籤文叫佢「先他人後自己」,Vincci表示自己一向都係考慮別人感受先,雖然可能因此而受到傷害,但其實做番自己,先會吸引到真正喜歡同適合自己嘅人。Don亦求咗支姻緣籤,籤文寫住「仔細聽取他人意見再決定」,佢對此表示疑惑,「他人係邊個他人呢?我就唔知喇, 因為好多人都有好多意見。」比起聽唔同人嘅意見,Don反而忠於自己嘅路,即使他人唔理解,「有啲人有時會問,你點解會選擇去鍾意同一個性別呢?但其實我覺得呢啲嘢係與生俱來嘅,鍾意一個人就係鍾意一個人。」同性戀並唔係「選擇」鍾意同一個性別,而單純係自然而然咁鍾意咗一個人,不受世俗既定嘅戀愛性別所限。當所有人都話佢錯,但Don仍然忠於自己嘅價值觀,係好勇敢去愛嘅表現。Don亦感恩自己身處香港比較幸福,更對香港爭取同性平權寄予厚望,「我唔會受到唔公平嘅對待,其實我覺得香港可以再行前一大步。」
第二站Don同Vincci就去到全日本三大瀑布之一嘅「華嚴瀑布」,觀賞中禪寺湖水由高97公尺峭壁高處傾瀉而下,近距離感受大自然嘅浩大。Vincci同Don搭乘電梯前往觀瀑台,落到幾廿米深嘅瀑布底部,見證瀑布水花四濺嘅貼身衝擊。Vincci一見到瀑布水花打落身上就勁開心,「哈哈哈哈哈,好開心呀,嘩好濕呀成個頭。」真係隔住個Mon都感受到佢幾開懷。不久,現場更出現雙彩虹,Vincci立刻瘋狂自拍,「嘩,係彩虹呀!見唔見到彩虹呀?」Don亦同樣表現興奮,「彩虹呀,見唔見到彩虹?係雙彩虹!你見唔見到呢個環形㗎?」大自然的確有讓人嘆為觀止嘅魔力,當看到世界之大,人身處大自然前之渺小,所有不快樂喺呢一刻都一掃而空。
旅程嘅尾聲得到天公造美,就好似上天都想祝福你哋可以Get over同Move on。下一集四位失戀團友終於返香港,最後佢哋有咩說話想講?又會唔會爆同行嘅失戀拯救團員大鑊?密切留意下集。
旁白:阿仙 撰稿:阿仙、由由 攝影:馮峰、馮燊明、阿仙、由由 後期:馮燊明 視覺設計:Cammie 編審:阿仙 編導:馮燊明 監製:阿仙
Don喜見雙彩虹,Vincci喺「華嚴瀑布」前玩到濕晒。
心情靚絕嘅Don,勁風趣咁叫導演影Vincci浸溫泉。
開朗嘅Vincci,一到步就好興奮係咁同當地日本小學生打招呼。
表情符號入面嘅「三猿」,好可能出自「日光東照宮」,意思係唔好睇、唔好講、唔好聽唔好嘅嘢同人哋嘅過失。
愛好大自然嘅Vincci,一去到戶外就手舞足蹈,自high一樣開心。
Vincci喺「日光東照宮」求咗支籤,籤文叫佢「先他人後自己」,其實即係做番佢自己。
比起聽唔同人嘅意見,Don反而忠於自己嘅路,勇敢去愛。
Don企喺「華嚴瀑布」底附近,以「巴西耶穌像」姿態擁抱太陽。
Vincci一見到瀑布就衝咗出去,任由水花打落身上,親身感受大自然嘅美妙。
Vincci同Don喺「華嚴瀑布」前,見證雙彩虹出現一刻。