【不斷更新】

接近晚上10點，喺表演嘉賓夭三八的環節當中，最後唱到《倚天屠龍記》主題曲《刀劍如夢》時，當年演出被封為「最美周芷若」嘅周海媚（海味），以古裝Look、加上皇后姿態壓軸出場，非常驚喜。

而表演完後，海味再以頒獎嘉賓身份同台灣小鮮肉張軒睿上台頒獎，而此時海味亦由本來進場嘅薄紗長裙，換成閃色晚裝，然後再披上一件薄紗，而未頒獎前，海味同張軒睿喺台上chit chat時，海味就叮嚀小鮮肉話：「好多女人都唔鍾意俾人叫姐姐，因為叫到老晒。」

《第53屆金鐘獎頒獎典禮》，將會喺今晚假台北市國父紀念館，早前因為演反派俾大陸網民圍插搞到要刪微博嘅海味，今晚以頒獎嘉賓身份現身頒獎禮。

大約傍晚7點，海味以一身黑色嘅薄紗長裙出現喺紅地毯，而海味亦不時伸出手，令佢條裙有飄逸感覺。雖然海味舉手投足都好有皇后嘅霸氣，不過佢個髮型同紫色嘅頭髮就依乎出咗事，嚇到台灣造型師陳孫華忍唔住批：「臉凍齡沒有問題，衣服也沒有問題，但我就是不懂她的髮型跟她的…，髮型、鞋子、指甲搭在一起，衣服是現代的，但人是更早的世代」，而路嘉怡則指海味嘅頭髮係「畫蛇添足」。

至於其後，被喻為凍齡女神嘅海味，被主持人問到點保養嗰陣，尷尬地笑咗笑，然後答：「我愛睡覺。」而當主持人問海味有冇機會再同台灣嘅劇組合作時，海味就話：「我真的很久沒有來台灣演戲啦，看看有沒有機會可以參演一下。」

精選娛聞，喺晒《娛果》
http://fb.com/appledailyent