袁嘉敏（Candy）今日去到柴灣接受nowtv梁思浩節目《娛樂審死官》訪問，節目主題圍繞大胸女喺娛樂圈係唔係發展好啲。

Candy話希望能夠運用佢自己熟悉嘅多種語言，喺演藝圈好好發揮，令到多啲人搵佢工作，Candy指佢喺電影《鴨王》中嘅沖涼戲俾到內地觀眾好深印象，宜家好多浴室用品搵佢傾拍廣告。

Candy最近計劃搬到山頂居住，佢話住開蘇豪空氣唔好，想空氣清新之餘，又想購置細單位租俾人，Candy話：「目標係唔過1000萬嘅樓，不過香港6、700萬都係得3、400呎，喺澳洲買可能實在啲。」Candy話宜家租樓唔會用超過月入嘅10分1，宜家3萬蚊租緊蘇豪。講到最近登台係唔係犧牲好大成日俾人摸，Candy話最近1個月登台8次，而佢有份演出嘅《殺破狼2》就嚟上映，佢話會發揮殺破狼精神，打退敵人，Candy話：「我做咗藝人6年，之前都捱過，要抓緊機會。」而早前流出疑似慾照，Candy話：「我唔睇都可以答你唔係我，因為我冇做過，堅持要話係我嘅，就由得佢哋喺腦海中幻想。」