【奇蹟康復】張父堅拒拔喉救回愛女一命 女兒奇蹟蘇醒與父擁抱
蘋果日報 2019/09/24 14:12
肝衰竭奇蹟康復張寶琪
【23:12 新增動新聞】
「爸爸，你好耐未抱過我，你抱吓我先啦！」患上急性肝衰竭瀕臨死亡邊緣的20歲少女張寶琪，三日前突蘇醒過來，當時家人都在她身旁，她第一句話便是對爸爸撒嬌要擁抱。
記者馮智敏 劉漢權
張父憶述過程時展示久違了的笑容，「我依家先識笑！」面對愛女病況，經歷「失而復得」的跌盪，他坦言現在心情稍為「鬆少少」，「呢一刻都係乸住，我真係冇乜瞓過。」
談到愛女蘇醒後的進展，張父掩不住喜悅說：「佢依家叻到三日來每朝7點打電話畀我，佢意志力強，發揮到自己本能。食嘢、飲嘢、講到嘢，佢個人開朗咗好多，感謝香港市民咁關心佢，醫護人員咁關心佢，佢狀態逐步增強，希望早啲出院。」
張父說，寶琪今日會嘗試落床，其他一切正常，但由於昏迷過，蘇醒拔喉亦只數天，現在仍不夠氣，不過能很快進食，已經「好犀利」。
他說寶琪昏迷的日子裏，同學、朋友都來到醫院，在她面前說開心事，又播放她愛聽的英文歌，「佢雖然昏迷，但所有人講嘅嘢，佢都聽到晒。其實佢有反應，抓佢腳板底會郁。」
雖然寶琪一度危殆，徘徊生死邊緣，張父對愛女不離不棄，「佢昏迷三日，冇食過嘢，醫生已經吹雞，（叫我們）有心理準備辦理後事，見佢（寶琪）兩行眼淚自己流出嚟。」
可能是心有靈犀，父女連心，張父抱着堅持不放棄態度，「判咗佢咁樣，話全部儀器要拔走，我當時指住啲人員講，寶琪依家仲有氣，你哋全部唔好郁，佢好正常，血壓、心跳、呼吸全部正常，你哋唔好拔走啲喉！」
事實證明張父的堅持是對的，「有個腦科醫生，佢真係好好嘢，睇（寶琪）隻眼有光，敲佢腳板底有反應。我要讚個腦科醫生，ICU（深切治療部）醫生好落力，睇到寶琪有反應，醫生都眼有淚光。」結果，家人永不放棄的精神，令寶琪成就了生命的奇蹟。「希望佢快啲出院，但係佢應該要留喺度一段時間，要慢慢恢復機能。」張父流露絲絲微笑，盡顯對愛女之情切。
你敢爆，我敢獎！ 立即WhatsApp《蘋果》24小時爆相爆片熱線 或致電：63836568
張父不放棄治療女兒，最終愛女奇蹟脫險。劉漢權攝