當年今日
關於我們

金融人語:曾蔭權深圳搵樓退休

蘋果日報 2012/01/30 06:00


特首跑馬仔如火如荼之際。我哋收到風,曾蔭權亦正考慮卸任之後的居所。特首近排同身邊朋友透露,有意到深圳買樓。據佢身邊朋友講,以今時今日嘅樓價,特首想喺香港買番間有體面的樓,都幾困難,所以轉而考慮一下深圳。但最後成事機會有幾多,就難以估計喇。
曾蔭權近年鮮有投資磚頭。根據資料,佢同太太鮑笑薇喺香港的唯一物業,就係麥當勞道64號碧雲樓,即係早前被揭發窗台僭建的單位。
曾蔭權名下碧雲樓三房兩廳連工人房嘅1800呎單位,稱得上係曾蔭權的「祖屋」。曾蔭權父親曾雲喺1978年購入單位,過身後將單位留給曾蔭權繼母,後來輾轉賣出。1998年,曾與太太以公司名義斥約830萬元買返單位。用同區的物業估計,單位的價格估計值1700萬元。除咗呢項物業之外,曾蔭權曾經喺行政會議申報持有英國薩里(Surrey)一項物業,但2007年起連任特首後未再申報,相信物業已經易手。
點解曾蔭權唔索性搬返碧雲樓「祖屋」,係擔心日後保安擾民,定係有其他原因,就不得而知。但曾蔭權由1995年擔任財爺起,已入住壽臣山財政司獨立屋官邸,之後接替陳方安生擔任政務司,又遷入山頂白加道15號政務司官邸。至2005年做特首搬入禮賓府,面積成兩個足球場咁大。曾蔭權仲專登起個錦鯉魚池。若然搬返碧雲樓,不單止養錦鯉難,上落鄰居仲撞口撞面,肯定好難習慣。睇怕住慣別墅嘅佢,都好難返轉頭住Apartment。
至於前任特首董建華就冇呢個問題,事關佢1997年做特首時,拒絕入住禮賓府(當時仍未正名),而係選擇居於自己嘅半山嘉慧園兩單位大宅。至2005年腳痛落台後,一直住到家陣。
曾蔭權考慮北上置業,相信同佢任內樓價飆升好有關係。佢2005年3月上任特首,當時中原城市領先指數只得約54點,至2011年中已超過100點,重越1997年高價,最近才稍為回調。豪宅物業升幅更加厲害,部份山頂洋房呎價喺2009年更率先升穿1997年高位,呎價3、4萬元只係等閒事。
內地人南下買樓催谷樓價,曾蔭權遲遲唔肯推出居屋同恢復定期賣地,亦令樓市火上加油。2009年發表施政報告時,有女醫生打上電台投訴買樓難,曾蔭權當時承認豪宅升到不得了,呼籲市民買樓唔好揀擇,「想喺中環買豪宅的確困難……買樓要量力而為,可以先買新界樓或者細樓。」估唔到退休後亦響應自己當年的呼籲,考慮跨境置業。
其實曾特首一年人工大約420萬元。要係香港買間2000呎的物業,負擔能力絕對有餘。即使香港樓價跌番少少,但若然喺中半山買層別墅,貼近目前的居住環境,就唔係咁易。好似山頂貝璐道裕熙園4000幾呎的獨立屋,舊年底以2.1億元成交,呎價相當於4.8萬元。即使係九龍塘,舊年底中國海外(688)喺牛津道發展面積7000幾呎的獨立屋,都要2.3萬元呎價,1.7億元先有成交。
雖然深圳樓價稱得上內地百大城市當中升幅之首,但仍同香港有段距離。況且深圳豪華別墅選擇多,每平方米售價5萬至11萬元人民幣都有,相當約6000至1.3萬港元的呎價。4000呎的大宅,2000幾萬港元就有成交,比香港平得多。
曾特首上月曾經話過,希望退休之後,以旁觀者的身份,一嘗免受採訪的自由滋味。佢選擇北上深圳安居,其中一個因素可能係冇咁易俾傳媒打擾。

雙曾香港物業少

除咗曾蔭權喺香港物業少,同曾蔭權份屬難兄難弟的曾俊華,喺香港僅持有灣仔一個約1400呎嘅單位,估計市值過千萬元。雙曾喺問責高官當中,手上磚頭價值算係相當少。
擁有幾億物業的唐唐辭去政務司司長後,問責高官當中,名下物業價值最高,要數到運輸及房屋局局長鄭汝樺。鄭汝樺與丈夫2000年以大約2800萬元購入何文田京士柏山一個頂層複式單位。以京士柏山現時逾2萬元呎價計,單位市值大約7000萬元。她另外亦持有何文田另一樓盤700呎的單位,加起上來,鄭汝樺手上磚頭價值接近8000萬元。
至於其餘高官手上亦有唔少豪宅。好似剛剛紮職的政務司司長林瑞麟,名下的赤柱柏濤小築豪宅,同另一個干德道蔚華閣單位,估計市值接近6000萬元。林瑞麟投資物業相當到家,曾經有傳媒統計,由1989年至今,林瑞麟單靠買賣港島中西區、南區物業已經獲利1100萬元,相當於佢現時擔任政務司司長3年人工。問責官員當中,只得發展局局長林鄭月娥喺香港冇樓,據申報,佢喺英國持有兩項物業,喺蘇州亦有物業。