韓國SBS綜藝節目《同床異夢2-你是我的命運》以情侶、夫妻為中心，呈現佢哋真實生活嘅一面，而節目去年7月首播後Keep住成為收視冠軍，有份演出節目嘅夫妻如于曉光及秋瓷炫、蘇怡賢及印喬鎮咁都大受歡迎。而韓劇《心動警報》43歲女星韓高恩今年8月起加入節目，孖住細4歲嘅圈外老公申蓉洙出鏡，同樣受觀眾喜愛。

韓高恩喺《同床異夢2》上透露，與老公於2015年認識，拍拖101日就閃婚，一度嚇親一眾主持人，不過韓高恩婚後就相當幸福。《同床異夢2》前晚播出最新一集，韓高恩更首度公開自己曾經流產嘅事，令觀眾為佢嘅經歷大感可惜及心痛。

前晚一集播出韓高恩、申蓉洙舉行二人聖誕派對嘅內容，場面溫馨。當中韓高恩及申蓉洙拎出以前結婚紀念日時寫嘅信嚟睇，韓高恩喺信中曾提到生BB嘅打算。韓高恩隨後坦言：「結婚嘅第一年曾懷孕，可惜流產，因為上咗年紀，所以有同老公去醫院檢查過，醫生話有自然懷孕嘅可能性。不過之後因為母親離世等等嘅事發生，所以亦冇專注喺懷孕呢件事上，現時一切順其自然。」

精選韓流，喺晒《娛果》
http://fb.com/appledailyent