陳志雲、王喜、葉童主演嘅舞台劇《雷雨對日出》，噚晚尾場，之後一班演員去慶功宴，陳志雲同王喜就鬼咁風騷，志雲仲重演摑王喜嗰一幕，皆因王喜話志雲唔識用力，志雲就反擊話：「我用力適當，好多人投訴話我打你冇聲。」之後志雲「啪」一聲打落去，跟住志雲又話王喜一場要踩佢背，但係次次都踩唔同位，一時踩，一時又冇踩，搞到佢無所適從，現場見到佢哋你一言我一語，真係好似耍花槍咁。

志雲話：「輕鬆哂，做完舞台劇，之前仲擔心傷風感冒，影響把聲，o依家可以盡情食，同埋王喜之前感冒，冇人咁惹佢。」志雲又提到葉童有一場戲差啲扯爛佢啲衫，佢話：「其中一部份係自殺，自己好驚件衫俾佢扯爛。」

葉童話做七場，近三個月都好緊張：「做得最好係日夜場嗰日，嗰日好虛，冇諗咁多嘢先演得淋漓。」套戲係講全部女人都係俾男人拋棄，佢一時感觸話：「自己屋企嗰件對自己都好好。」提到陳志雲差啲被扯甩衫嗰場，葉童話：「都係拉佢件衫，想做啲強烈啲嘅效果，所以動作大啲。」