愛爾蘭公司騎師夏禮賢於3月6日，憑「開心神駒」爆大冷贏谷草開齋後，以為表現會蒸蒸日上，點知運氣麻麻，至今未再有頭馬進帳。

剛周日（24日）夏禮賢騎「帆哥兒」，喺最後300米走勢凌厲，以為贏得之際，卻受「夢幻人生」干擾，只能以第四名過終點，經抗議同研訊後，雖然升上季軍，但夏禮賢表情如死灰，喺香港贏一頭馬有幾難，大家都心中有數，尤其佢人際網絡仍未夠多。

不過，夏禮賢性格樂觀，打逆境波都冇有怕，繼早前學廣東話，識得講「你好」丶「早晨」丶「唔該」等簡單卻非常重要嘅廣東話後，佢為咗令馬主留下印象，每次出賽前喺沙圈，都會提到自己嘅姓氏Harley，同著名電單車品牌哈利（Harley-Davidson）的名字相同，藉此打開話題。

夏禮賢喺香港同歐洲都冇揸電單車，但用哈利電單車做開場白都唔錯，話晒賽馬都講求速度。

但如果夏禮賢想繼續喺香港發展，目前佢最低造123磅，的確偏重，局限爭取座騎嘅機會，佢來港初期曾話過自己可以減至121磅，但當時可能怕減磅辛苦，語氣有啲保留，唔知現在會唔會改變初衷？

今期（31日）沙田賽事，姚本輝同夏禮賢有三駒合作。其中，「新界之星」已減咗好多分，近仗亦有接近走勢，日前出戰從化示範賽，喺1800米得第五，半條直路都搵唔到位望空，有啲失運。

今次「新界之星」出戰第二場五班1600米，對手實力庸劣，此駒話晒今季常喺田草跑得接近，加上抽到有利嘅4檔，有多少着數，相信「哈利仔」夏禮賢一定好好把握，以證明自己身價。

-----------------------------
免費訂閱《蘋果動新聞》， 無懼霸權橫行！立即登記！
https://hk.adai.ly/bXz2v29BrV
-----------------------------
《動腦Q》周末主題夜
追加星期六、日 9:30 pm
星期一至五 10:30 pm
Day Day Q the money!
https://hk.adai.ly/veCxssynnV