恒隆地產（101）主席陳啟宗唔知係咪諗緊幾時退休，最近喺內部刊物《連繫恒隆》接受員工訪問，忽然一副叮囑後輩嘅語氣，叫阿仔陳文博（Adriel）同埋候任總裁盧韋柏（Weber）要將公司變成世界級，就好似F1方程式咁，為交棒做好準備咁喎。
陳啟宗回顧過去8年，恒隆發展至內地8個城市，佢形容當時起樓多咗，租務又多咗，營運不確定性高，尤其係2009年至2011年，不過喺Philip（現任總裁陳南祿）帶領下基礎已經打好。

要慳油減磨損行得順

但佢同時又形容Philip好不幸，因為身處年代比較困難，而Adriel同埋Weber就比較幸運，因為恒隆已經由買地起樓、租戶聯繫，發展到目前重視管理同營運，增加顧客聯繫等，亦都因為咁嘅原因，佢就搵咗喺銀行、零售業有廿幾年管理經驗嘅Weber加盟。華華心諗，言下之意即係未來發展策略會偏向保守，減少擴張呢？
陳啟宗冇透露係咪咁嘅意思，但就話兩位領導層嘅策略就係要將恒隆呢架車做到世界級，可以去F1方程式比賽，「只要將架車調校好，唔單止可以慳油，仲可以減低磨損，行駛暢順，拎到F1冠軍」。睇番恒隆噚日市值843億元，千億都冇，對於股東而言，除咗做到世界級，公司股價有力升都好緊要㗎。

李華華
mailto:[email protected]