曼聯七小福舊時立下唔少豐功偉績，收山之後都有合資搞球隊沙福城，同埋搞酒店等嘅生意，講到做教練呢，呢班人入面最早坐正就係加利尼維利，不過做得唔長，而傑斯就一路努力頴撈不成，𠵱家據《BBC》話佢同比拿美爭緊做威爾斯領隊，而菲臘尼維利就大有機會做英格蘭女足主帥，兩個隨時齊齊教波！
七小福入面，碧咸就喺各行業都多姿多彩，𠵱家仲搞緊隊美職球隊做吓班主，而畢特就喺曼聯青年軍度做阿頭，發展都相當好，史高斯同加利佬就講波，至於傑斯反而就比較慘情，佢喺2014年曼聯炒咗莫耶斯後做咗一陣看守領隊，然後變咗雲高爾副手，後者被炒後佢都跟住走埋，之後逢親英超話炒領隊後，都扯到去傑斯身上，由史雲斯、西布朗、史篤城全部傳過，不過都係煲冇米粥。
威爾斯世盃外出局後，基斯高文上年11月辭職，個位吉到𠵱家，《BBC》話傑斯上禮拜五面試後仲係大熱人選，對手之中以另一個威爾斯前隊長、𠵱家卡迪夫城U18教練比拿美最有威脅。據《每日郵報》話威爾斯足總最快下個禮拜一公佈新領隊人選。

菲臘佬或掌英女足

至於尼維利兩兄弟，就因為同華倫西亞班主、新加坡富商林榮福相熟嘅關係，菲臘佬就喺15/16球季已經去咗華倫做助教，然後季中加利佬直情坐正做主帥，兩兄弟拍住上，不過成績唔掂教咗唔夠四個月就被炒。不過據《BBC》話菲臘佬準備捲土重來，隨時去教英格蘭女足，帶隊下年參戰世盃！
但係呢，菲臘佬嘅教波功力，睇嚟得唔到佢講波同行兼利物浦名宿加歷查嘅認同，話說加歷查上禮拜四就代表《天空體育》，喺紅軍嘅米活訓練場訪問華基爾雲迪積克，之後將合照擺上ig，菲臘佬留言就話「你（加歷查）喺利記訓練場住？」笑對方老是常出現。而加歷查就爆粗還擊：「呢度（利記）經常歡迎我，唔似得你喺卡靈頓咁唔受歡迎，你同莫耶斯搞X到一鑊泡！」