【本報訊】七警被判囚兩年，多個親政府組織昨晚舉行燭光晚會支持七警。但原是撐七警集會，最後卻淪為騎呢騷。除了各撐警團體代表輪流發言外，大會播放多首改編的撐警歌曲，又呼籲台下市民高舉手機燈以代表燭光；有參加市民即使入黑仍戴上墨鏡，手持類似演唱會用的發光棒。晚會尾段，大會邀請出席的市民上台大合唱《男子漢》，現場猶如演唱會。

陳形容七警是7個超人

義務擔任大會主持的跳唱女子組合FFx前成員楊澤怡，亦有唱其新歌《天燈》撐警，「希望大家心聲、大家願望好似天燈咁一一實現好唔好？」籲市民支持七警及捐款，表演期間全場再次高舉手機燈配合，而大會投影機除顯示天燈照片，亦打出她的中英文名。集會後她接受訪問時承認，未來可能會加入正義聯盟黨，又認為警察可憐，指七警只是執法期間行為失當，判入獄兩年過重。
自稱網絡紅人的陳玉娥亦有出席晚會，她指七警判刑過重，斥曾健超是暴徒及「低B怪」，「佢係咪黐線㗎，明明自己唔啱，仲要警察出嚟道歉？」她形容七警是7個超人，伸張正義，建議未來特首可以進行大和解，特赦七警及佔中搞手，「放晒7個超人同班衰人，嚟個大和解」。她一如既往手持稿紙，滔滔不絕發表言論幾分鐘後，台上主持忍不住打斷：「呃，娥姐……」惟陳玉娥仍意猶未盡，再說近1分鐘才結束發言。
■記者紀靜雯、潘柏林