李克勤喺紅館舉行一連9場演唱會今晚正式開鑼，下午6點10左右，一身黑色衫褲、襯黑帽嘅克勤步出紅館後台拜神，有近30位fans冒雨守候，及大叫「克勤加油！」克勤數度向fans揮手致意。

之後，克勤親自上香、奠酒及化寶，祈求演出順利，喺切過豬後，克勤企定定俾傳媒影相，之後就返入後台為今晚演出作準備。

另外，場館外有設售賣紀念品嘅攤位，有全球限量郵票（500套），每套350元，另有演唱會T恤，分大人及小童size，分別賣250元及150元。其他售賣精品還有tote bag，每個190，唱片分黑膠版及CD版，分別賣300元及130元。