韓國9人女團TWICE於2015年出道後大受歡迎，獲封「新國民女團」，人氣高企，隨之而來嘅就係冇間斷嘅工作量，包括出專輯、上音樂節目宣傳、飛嚟飛去世界各地開騷，相當忙碌。TWICE上周更連續出席《MAMA音樂頒獎禮》嘅日本及香港站，成員離港時都一臉倦容，子瑜上月更一度疑似捱到病，缺席新碟嘅簽名會，令粉絲相當擔心偶像嘅健康。

TWICE成員定延噚日透過直播同粉絲溝通，表示孖住演員家姐孔升妍外出買禮物畀隊友，又坦言因為緊湊嘅工作行程而覺得好攰。定延哽咽表示：「我哋正喺日本舉行巡迴演唱會，返到韓國就要拍新歌MV，仲要影專輯封面照，要做好多嘢。」續指：「我想成為佢哋(TWICE隊友)嘅支柱，但卻做唔到，真係好對佢哋唔住。雖然我哋仲要向粉絲展現開朗嘅面貌，但我哋已經無法掩飾疲憊嘅狀態，好對唔住大家。之前因為想報答粉絲，我就提議喺拍MV時順道拍埋編舞影片，但見到成員都咁攰，(仲叫佢哋拍)真係好對不起佢哋。」定延之後更忍唔住喊，令粉絲相當心痛。

就連TWICE其他隊友就覺得心痛，紛紛喺官方Instagram留言為定延及隊友打氣。彩瑛寫道：「做咩要喊？真令人心痛，我愛你，同埋多謝你，愛TWICE嘅9個人亦愛ONCE(粉絲名稱)，我哋一定要保重身體就咁樣一直走下去。」Sana亦表示：「一個人喊一個人直播，仲要宣傳新碟，都係你搞喊我。定延啊，一直都好多謝你，TWICE我愛你，聽日眼腫嘅人都要怪定延。」可見TWICE眾人嘅好感情。

精選韓流，喺晒《娛果》
http://fb.com/appledailyent