澳洲當局早前實施咗馬匹檢疫新規定，暫停讓來自香港的馬匹進口澳洲後，馬會一直好積極同嗰邊磋商，希望尋求解決方案，不過澳洲方面嘅反應都係愛理不理，一副你急佢唔急嘅態度。人哋唔肯傾唔肯讓步，馬會都冇晒符。繼續被動都唔係辦法，據知馬會方面已經諗到應對策略，嚟緊會主動做啲嘢反擊。

馬會一直喺澳洲推新檢疫限制呢件事上，都係保持容讓態度，希望唔掂傾到掂，但係對方硬係拖拖拉拉，又唔肯傾有乜代替方案，馬會再客客氣氣都係嘥氣。據知馬會已有應對措施，初步會減少越洋轉播澳洲當地賽事受注，實行打經濟牌減少同澳洲方面嘅馬會合作。

現時越洋賽事轉播賽日嘅次數有限制，即使馬會唔播澳洲馬，其實仍然有唔少頂級賽事可供選擇。據知馬會計劃會越洋轉播多啲日本方面嘅賽事，填補原有轉播澳洲馬嘅空檔，情形一如啱啱平安夜當日轉播日本有馬紀念賽日，馬迷反應亦相當唔錯。平心而論，馬會播多啲日本馬都唔係倉卒決定，亦可以話係投馬迷所好。

事實本地有唔少馬迷，特別係較年輕一輩，對日本馬情況都跟得好貼，有一定程度認識，而非一般投注越洋賽事隔山買牛、亂石投林。

喺亞太地區嚟講，只有日本馬嘅水準同香港馬有得揮，特別近年歐洲頂尖騎師好似李慕華同杜滿萊長駐日本，又有莫雅同布文呢啲頂級高手客串，人馬都有好高可觀性，馬迷有得揀都玩日本馬唔玩澳洲馬。其實馬會對澳洲擺番個強硬態度絕對正確，講多無謂，利益永遠最實際，澳洲方面有損失，自然態度軟化。

阿Joe