恭喜！恭喜！

狄龍個仔譚俊彥(Shaun)喺噚晚榮升做第二任爹哋，太太任祉妍誕下重7磅9安士嘅囝囝，湊成一個好字。今日凌晨譚俊彥都有喺微博貼咗一家四口兼仲有爺爺狄龍嫲嫲陶敏明嘅合照，譚俊彥留言話：「大家好！我是譚杺，母子平安！」

o依家Shaun拍緊大台劇集，日日都要趕拍戲，但係再做爹哋心情梗係興奮，今日Shaun接受傳媒訪問話：「多謝晒呀，你問我梗係開心喇，不過就好「哩hea」好多嘢都未搞，本來預咗係9月2號開刀，點知太太噚晩話肚痛，我阿媽話唔得要生喎，咪即刻同佢去醫院，跟住我太太咪打俾我，我去到之後，已經即刻推咗入產房，嘭嘭聲就生咗！」Shaun仲話：「本來過2日拎咗假期，但係o依家會銷假繼續拍，呢套劇拍到中間都幾緊張，基本上日日都開工，噚晚搶完閘之後，我又去咗開工，今日就即刻早班，真係好攰！」

講到囝囝個名叫譚杺，唔知係咪爺爺改呢？Shaun話：「其實呢個名改咗好耐，我哋一路都想第一個BB叫『談情』之後又叫『談心』，嗰個『心』字又要廣東話同國語都係嗰個發音，最後我太太就搵咗呢個『杺』字。」再問2歲嘅家姐譚晴見到細佬之後，又有乜反應呢？佢笑住話：「佢一路都唔肯瞓覺，成晚話要搵媽咪，因為佢慣咗媽咪陪佢瞓，最後我俾細佬啲相佢睇，咪不停叫細佬，暫時都唔知BB返屋企之後，佢會有乜嘢反應！」