保良局今日喺九龍灣舉行「關懷長者心」地區安老服務計劃閉募禮，保良局主席郭羅桂珍、副主席陳細潔（Abby）同蔡李惠莉一齊同千位長者團拜。

蔡太加入保良局9年，明年就會榮升主席，佢話喺局入面體會好多，亦都學到好多嘢，佢仲話已經有心理準備做咗主席之後會好忙，咁咪少咗時間湊孫？蔡太話：「O依家都少咗，因為要忙學校同公益，一個星期見佢哋一次，8個孫好熱鬧，個個都抵鍚。」

講到噚日情人節，蔡太就話蔡生（玩具大王蔡志明）一早已經送咗大禮，係巨鑽一枚，蔡太話：「好開心，同3對人一齊食飯慶祝，佢之前已經送咗大禮，係巨鑽。」蔡太仲話蔡生唔似後生仔咁浪漫，咁蔡生有冇浪漫嘅時候？蔡太話：「送花一定有，佢好得意，唔一定要節日先送禮物，耐唔耐隨時都可以送。」

至於Abby今年即將榮升主席，家姐陳小寶就叫細妹要多加注意健康，Abby仲預告呢兩年都唔會拍拖，佢話：「呢幾年都冇乜時間拍拖，咁忙都唔好意思。情人節都冇出去食飯，花就收到好多扎。」陳小寶仲爆細妹好多觀音兵，提議叫晒佢哋一齊做義工幫助有需要嘅人。