上個禮拜五美股偏軟，昨日㗎仔嗰邊造好，港股好似冇乜方向咁，喺18100附近「雲遊」，都幾悶，時間就係咁虛度咗，恒指收市跌少少，成交亦縮咗啲，今年首次有地皮勾出，但係好友冇利用呢個消息挾住啲地產股炒上，睇嚟喺結算前班大戶都係專心玩轉倉，等外圍畀明確嘅指示先至發功。
油價同金價幾反覆，令到相關嘅股份好波動，雖然大形勢向淡，但係啲對沖基金短炒嘅活動或者仲未完，可以留意下金價嘅變化，如果金價出現單日回升5至6美元，企喺590美元樓上，睇嚟都會有一次抽上610美元嗰頭嘅機會，短炒一轉應該有唔錯嘅回報。
兩大成份股都靠穩，不過滙控（005）就保唔住早段嘅升幅，平收147.20元，等緊機會炒上。中移動（941）向上個勢keep住，試炒吓啲輪都可以。昨日推介嘅招行C輪9027最高升上1.96元，收市升1個位，招行（3968）走勢幾好，可以繼續炒。

中行C輪2466：中行（3988）昨日一度突破3.43元阻力位，收市冇升跌，但係成交就大增，令到10日線上面嗰個「十字星」變得有意思，應該好有機會趁住工行（1398）掛牌啲時刻炒上，升破3.43元收市，可以上試3.60元，如果個市就，有機會上到3.70元。
中行C輪2466昨日報收17.9仙，仲有129日壽命，溢價4.6%，唔算貴，槓桿率19.1倍（有效11.2倍），對沖值0.59，輕微價內，正股出現突破，對沖值嘅效應會發揮得好好，街貨多，應該幾好炒，正股升上3.60元同3.70元，2466應該見30仙同埋37仙，呢個價買番啲，正股跌穿3.32元止蝕。
俊　樺