中國男籃又輸多場，而以72:68贏波嘅委內瑞拉靠嘅竟然係高比拜恩（Kobe Bryant）……嘅表弟！

中國男籃喺分組賽第3輪輸咗俾委內瑞拉，目前喺A組三戰三敗，出線機會相當渺茫。今仗對住同組實力較弱嘅委內瑞拉，中國隊表現唔算太曳，「易帝」易建聯仲攞到18分10籃板嘅雙雙成績，不過最後都差少少、未能打開勝利之門。

委內瑞拉今場贏波，原來要多得高比拜恩嘅表弟約翰葛斯（John Cox）。葛斯同啱啱退役嘅高比一樣係打後衛，雖然佢今仗同高比一樣瘋狂「打鐵」，射10入得1球，不過就造就隊友搶到12個進攻籃板，都可謂「用心良苦」。

兩名NBA嘅中國新兵表現就差天共地，回勇嘅周琦攞咗11分、2籃板、2封阻，不過上陣超過10分鐘嘅王哲林就做咗「三0部隊」，0得分、0籃板、0封阻，咁嘅表現點打NBA？