啱啱釋完法,中方即時搞作,準備影響九月立法會選舉。《風波裡的茶杯》李鵬飛踢爆,好多喺廣東省做緊廠嘅,或者本地中資機構員工,收到中方嗰頭有勢力人士柯打,叫佢哋九月選舉,要拉足若干張選票,一定要投民建聯或親中候選人。
飛哥、林旭華同梁文道等茶杯「鋤奸三俠」,即時傳召選舉事務處高官對質。選舉事務處高官話,操縱或影響選舉投票結果,屬刑事罪行,最高可罰款五十萬,入獄七年,又呼籲選民踴躍舉報親中勢力嘅小動作,同時叫選民唔使驚,因為入到投票站,投邊個票,冇人會知,即是冇人可以控制到一個人嘅自由意志。
飛哥哋問得好:若然中方利用高科技,到時下令特區各土共社團單位嚴密監視中資員工嘅選民,叫佢哋帶部儍瓜機或視像手提電話,入到去投票站之後,填表填正親中候選人嗰格,然後自拍數碼相為證,出面就有人直線監視,或者事後要佢哋提交相片為憑,否則就炒魷、減薪、降職,咁特區政府點樣保障市民人權,令中資員工不受政治恐嚇?
選舉事務處高官話:咁就易啦,若然要交差,喺投票站帳幕之內,詐詐諦填咗個親中候選人嗰一格,再自拍照片,然後再將嗰個「剔」塗黑咗佢,喺民主派候選人嗰一格畫一個更加大嘅「剔」,咁點票人員就會收到,唔當廢票,會計民主派一票。
飛哥等茶杯「鋤奸三俠」又追問:點解唔可以下令不准攜帶相機、手機等入票站,好似機場過境「實Q」檢驗咁?高官就咿咿哦哦答唔出,話咁做驚住擾民。