距離2019年農曆新年仲有四個幾月，喺《復仇者聯盟4》仲未有得睇之前，農曆年絕對可以支持一下港產賀歲片喎！

上年嘅港產賀歲片有《棟篤特工》、《我的情敵女婿》，子華神黃子華夥拍佘詩曼嘅《棟篤特工》，仲大收4千幾萬，認真唔講得笑。咁今年嘅笑片又有乜嘢選擇呢？

除咗王祖藍早前透露會一嘗執導演筒滋味拍賀歲片，平時攪攪震嘅林敏驄，原來都有「處男作」，會做導演兼編劇拍賀歲片，戲名暫定叫《如珠如寶》，電影今個月底就會正式開機。

噚日阿驄出席活動，撞正喺王祖藍電影負責監製部份嘅曾志偉，志偉即刻講笑話：「你巴閉啦拍賀歲片打我！打我呀！」阿驄就抵死回應話：「咁多人打你，唔差在我打埋你一份啦！」

阿驄今日接受《蘋果》，講到佢同志偉打對台，佢就笑住話：「同志偉亦師亦友，大家都係friend，不過我估到晒佢拍嗰啲係乜0架啦！哈哈哈！」然後又話自己呢部戲本來20年前已經開拍，只係當時愛情至上，「嗰時隻艇撐咗出去吖嘛，依家時辰到，返番嚟喇！」問佢點睇今次嘅競爭對手？佢就好似前年候選金像獎男配角，搞Gag話：「都話全部唔係我對手，我對手喺呢度！」

精選娛聞，喺晒《娛果》
http://fb.com/appledailyent