曾爵士坐正特區行政長官寶座，任期目標，唔係兩年，而係至少七年，雖然有老鄔力阻，不過亦由親中商人曾利來以國家領導人身份，露天機肯定嘞！

新時代，新作風，爵士橫掃平機會，鏟除前朝廢董餘孽，改組行政會議，亦部署緊動作，另外重準備郁埋香港電台，同時又將權力指揮部，搬番入去上亞厘畢道嘅港督府，將董朝「禮崩府」呢個不倫不類嘅衰名，大可改為曾公館㖭！
咦，真係好似毛主席話頭，「大破大立」喎！爵士嘅新作風，招招都擺到明係同前朝廢董莊嚴決裂嘅大行動，唔怪得連賭王亦挑通眼眉，以受害人身份，搶先瞓身批董，發出「老董迫我講大話講足七年」嘅血淚大控訴！
講到廢董罪行，又點止迫何鴻燊老來講足七年大話咁少？對中環行政人員精英及半山區中產階級，廢董第一條罪行，就係任內悍然將下亞厘畢道「政府總部」落炮台里嘅泊車吉地，加設英國白金漢宮式黑金大鐵閘，阻止市民由花園道步落中環！
回憶殖民地時代，異族統治，歷任港督，門戶開放，對港人高度信任，「政府總部」（即前政府合署）門前空地，任由往來，前港督衞奕信，重時時取道該停車場，由港督府行落立法局㖭！
在殖民地時代，政府合署門前夜不閉戶，市民高度信任英廷，半夜三更抄道行經，亦路不拾遺，停車場漏夜免費泊車，方便精英中環夜宴飯局，氣氛和諧而甜蜜！

點知廢董一上台，即時搭妖閘封路口，高高在上，截市民所急，封市民所想，一座柏林圍牆咁，結果惡有惡報，呢座大閘，有壞風水，黑色，一支支尖矛咁，董政權自造殺氣，結果八年唔夠就覆亡！
爵士上台，應該好似列根咁，就去柏林圍牆邊嗌一嗌：「Teardownthiswall！」咁啲公僕擦鞋仔就會做嘢拆大閘，還吉地於民，唔拆咗呢道妖邪黑閘，曾政權又點坐得穩？喺風水局上，花園道同炮台里打通，啲怨氣多一條宣洩管道。


爆料熱線：29290000、27860099
報料傳真：26239278
報料電郵：[email protected]