有成14年歷史嘅幻彩詠香江，今個星期五會以新版本登場，會有多達40幢大廈同地點參與，包括以香港為母港、逢周五泊喺啟德郵輪碼頭嘅郵輪嘅「世界夢號」，其中10個點係第一次參加匯演，會透過外牆LED屏幕顯示唔同圖案。 新版本特別之處係喺添馬政府總部同稅務大樓嘅頂部，亦增設LED光束燈，加強燈光效果。

新版幻彩詠香江會如常喺晚上8點上演，但時間就會由舊版嘅13分鐘縮短至10分鐘，音響效果亦同時更新。

與此同時，冬日版嘅「閃躍維港」光影匯演亦會喺呢個星期五至12月28日，喺文化中心露天廣場同步舉行，屆時會有飄雪特效營造聖誕氣氛，文化中心外嘅噴水池面，仲會擺放巨型水晶球，水面舖滿色彩繽紛嘅LED球，等大家盡情投入聲光盛會。