八方相當年:
似足奶媽 小麗成日考第一 
中三開始自己賺錢自己使 - 李八方

蘋果日報 2017/02/21 00:00


憑炒魷魚炒到上庭而聲名大噪、甚至喺立法會選舉勝出嘅小麗民主教室立法會議員劉小麗,細個原來同𠵱家嘅特首參選人林鄭月娥有共通點,就係經常考第一。40歲嘅小麗話自己叫做有啲讀書天份,讀小學經常考第一、攞100分,只係「偶爾考過第二」。咁有冇好似奶媽咁,考到第四會喊爆然後發憤圖強?小麗話梗係冇啦,因為佢唔太在乎名次,反而人哋嘅期望,就令佢有壓力。
empty
6歲嘅劉小麗騎喺石獅子上留影。劉小麗提供圖片
愛闖鬼屋打籃球
小學讀得咁叻,中學梗係派第一志願啦?原來又唔係喎,小麗話當年想跨區讀名校庇理羅士,點知派唔到,派到第二嘅英華女書院(派第二志願都讀到女英華,真係強),但佢一樣讀得好開心。中學成個男仔頭咁,最記得當年同同學去高街鬼屋,仲鍾意長跑、打籃球,到𠵱家自己一唔開心,就會去跑步紓解鬱悶。
小麗讀理科,但選大學時又想住宿舍,想讀吓啲人文學科,所以就決定讀中大社會學,佔中發起人陳健民就係教小麗嘅老師嘞。
empty
讀名校女英華時剪咗個男仔頭。
empty
當年喺中大讀書嘅小麗仲做埋tutor。
自細家貧嘅小麗話,細個冇乜嘢娛樂,注意力放晒喺書,成績叻令佢可以搵外快:「我中三就開始幫人補習,幼稚園、小學生都補過,(收幾錢一個鐘?)80蚊!」嘩,真係書中自有黃金屋。中七時佢走去診所做執藥護士賺錢,睇嚟小麗都好生性幫補家計喎,佢笑笑話,係自己賺錢自己使,冇咩幫補。
小麗話中小學嘅教育影響佢好多,小學老師教佢判斷人係睇佢嘅品德同成就,唔係錢;中學就教佢除咗分數同錢,仲有更多值得欣賞嘅嘢,如友情、理想同知識。

李八方
empty