立法會財務委員會噚日馬拉松式開會，實情係上屆主席陳健波為保連任成功，於是由佢自己決定加會，等佢自己可以喺建制派支持下做到主席，真係幾荒謬，但更荒謬係一班建制派發言，好似成日俾人質疑佢個博士學位流流地嘅民建聯葛珮帆（圓），噚日喺財會主席選舉入面，向民主派議員提問，但就講到唔知去邊，一陣又話對前日有人「蓄意謀殺」警察感到痛心，又話要問民主派議員會否譴責暴徒試圖殺警，但咁又關民主派選財會主席乜事？

語言表達能力奇差

到毛孟靜發言時，毛姨姨即不點名話要回應「假博士」查詢，批評假博士語言表達能力非常差，包括曾係「不要性暴力」嘅橫額上打大交叉，令人以為有議員支持性暴力，更曾稱警察「超過十成燒傷」，令人啼笑皆非。


葛博士聽到梗嬲，仲向主持會議嘅陳振英投訴，話毛姨姨係咪回應緊佢嘅提問？話毛姨姨話佢係假博士，令佢覺得冒犯，但葛博士立即俾毛姨姨KO，毛姨姨直情話對葛提出質疑表示歡迎，希望葛博士可以公開證實佢並唔係一個假博士，而葛博士聞言後只喺位不斷擰頭，唔肯再回應，如果咁委屈應該即刻回應嘛，𠵱家唔反駁，會俾人覺得佢默認喎！