【獨家】田雞稱手足被迫轉行裝修揸的士 8成電影從業員冇工開
蘋果日報 2019/12/28 06:00
電影田雞工作
今年因反送中引發的社會動盪環境，再加上大陸影視圈又進入冰河時期，有約2,000間中國影視公司倒閉，連帶影響到香港電影工業進入低谷期，今年香港僅攝製了47部片，破了開埠以來最低紀錄，香港電影工作者總會會長田雞表示：「低處未算低，而家只係開始，我覺得出年情況係會更差，因為啲老闆完全冇開戲意欲！」
今年香港經濟環境惡劣，街頭抗爭運動令市民沒心情消費，戲院生意在下半年銳減，港中兩地電影公司老闆因看不清前景，不敢貿然開戲，再加上大陸開始排擠香港幕前幕後影視人，8成從業員已經接近半年沒工開，被迫要轉去當的士司機或去登記做Uber司機，道具就轉去做裝修。田雞表示：「其實裝修搵嘅錢仲多過拍戲，但因為佢哋熱愛電影先會堅持做落去，但而家環境真係太差，特別係有啲手足係手停就口停，唔轉行都唔得。」
田雞指今年電影比2003年沙士時期更嚴峻，他說：「由於香港冇乜戲開，再加上社會動盪，香港投資者又好、大陸投資者又好，都唔會選擇喺呢段時間開戲。就算有戲開，好似之前兩部賀歲片咁，一部係黃子華，另一部係李璨琛嘅，原先兩部話喺香港拍，但李璨琛嗰部涉及警察題材，呢個時候似乎唔係咁啱喺香港拍，所以後來搬去泰國拍，一來成本問題，二來拍泰國警察大家就冇意見，咁結果我哋一部純港產賀歲片就硬生生走咗去外地拍；而子華嗰部因為香港成本太貴，大部份戲要去深圳拍。」
香港電影製作成本屬全亞洲最高，因人工太高的關係，反而削弱了香港競爭力，田雞表示：「5、6年前我已經同業界講我哋嘅人工係全亞洲最貴，貴喺一部戲基本嘅成本。好彩我哋香港仲有議價空間，如果成本低嘅戲同crew有交情，好多係肯收平啲，咁變咗香港出現一個好極端情況，開嘅戲一係成本好低，成本高嘅戲就可能唔選擇喺香港拍，然後請番部份香港工作人員出外拍囉！咁嘅情況香港工作人員開工機會自然少。」
田雞指早幾年大陸其實已開始排斥香港工作人員，但情況沒今年嚴重。今年發生反送中風波，再加上大陸自己也減少開戲量，自然有戲開都請回自己人：「其實都唔係關晒今次社會運動事，最主要係兩地工作人員文化唔同，就最簡單佢哋慣咗接一部戲會畀佣金中間人，我哋香港唔興呢套，係明碼實價收錢，唔會肯畀佣金。」
中國影視行業一向是由資方支付稅款，但去年底開始稅項由本來不足10%急升至42%後，資方都不肯與演員、工作人員簽除稅後的合約，而勞方也不肯讓步，結果勞資雙方都不肯退讓；再加上題材審查更嚴格及需時不短，已經拍起的電影隨時因政治問題過不了審查被撤檔，老闆好容易血本無歸，所以不少影視公司都寧願不拍。
直至這兩個月來，中國演員和工作人員都知道今時不同往日，終於肯作出讓步，願減兩至三成片酬，稅款就各自負責一半，老闆才願意繼續投資。問到田雞，香港人員願跟隨減價嗎？他說：「我覺得香港手足會冇乜減價空間，因香港生活指數高，唯一係多工開先有減價空間，因為好多工作人員以日薪計，好朝搵埋落雨柴，如果少工開，佢哋人工只會向上漲，彌補番冇工開嘅日子損失。」
攝影：沈健程
香港電影工作者總會會長田雞表示：「而家環境真係太差，特別係有啲手足係手停就口停，唔轉行都唔得。」
田雞指今年電影比2003年沙士時期更嚴峻，本土電影亦被迫去外國拍攝。
田雞指早幾年大陸其實已開始排斥香港工作人員，但情況沒今年嚴重。
田雞說：「我覺得香港手足會冇乜減價空間，因香港生活指數高。」