各位觀眾，四條煙！勇士上季NBA總決賽喺大好形勢下輸畀騎士，今夏就簽咗「雷神」杜蘭特（KD、Kevin Durant），組成更屈機嘅組合。呢支新勇士上周六終於亮相，喺首場季前熱身賽對速龍，杜蘭特、史堤芬居里（Stephen Curry）、K湯遜（Klay Thompson）同祖蒙特格連（Draymond Green）齊齊正選上陣，雖然以93:97不敵速龍，但四條煙淨係打半場當熱吓身，輸贏梗係冇所謂喇。

球迷噓KD 居里抱不平

呢場波喺溫哥華上演，KD歸隊後只係參加咗勇士三課操練，狀態肯定麻麻，佢上陣19分鐘九射兩中得九分；居里都係未上力，三分球五射中得一球，只打上半場拎八分，打得最醒神係K湯遜，有16分進賬。
勇士球員打得相當輕鬆，有時仲玩吓嘢，好似伊古達拉（Andre Iguodala）喺第一節完之前引球突破，俾兩個對手夾擊下諗住後手交畀杜蘭特，點知冇晒尺寸，個波飛咗去坐喺後備席嘅居里度；居里一於唔客氣，接住個波就起身射個超遠三分，不過都係唔入。勇士上半場投射命中率只得37.5%，教練卡爾（Steve Kerr）下半場就派晒後備球員出戰，最終輸畀速龍四分。勇士全場有成21次失誤，除咗四條煙冇乜表現之外，其他球員表現都係一般。今季新兵中鋒麥伊（JaVale McGee）算係比較搶鏡，上陣16分鐘有三次封阻，仲貢獻五分四籃板。
杜蘭特賽後話：「手感一般，但𠵱家唔需要太急，兩隊喺場波都有呢個情況。」KD選擇離開雷霆過檔勇士，俾唔少人視為叛徒，呢場熱身賽亦都有觀眾向佢柴台。居里賽後就替KD抱不平，質疑班球迷為乜要噓佢：「我高度懷疑到底場上有邊一位球迷，係有俾KD轉會嘅決定影響到。」KD就回應話冇所謂，覺得聽到歡呼聲仲多啲。