陳淑蘭（蘭子）之前同好姊妹Crystal引起一場罵戰，事隔幾日，蘭子今日返電台，見到傳媒佢開腔回應，佢話︰「由頭到尾都冇話罵戰，件事幾莫明其妙，都愕然，本身我有個朋友介紹佢（指Crystal）入一間公司度做，之後公司唔再同佢續約，酒店餐廳嗰度，你介紹咗人哋做咗咁耐，只係多謝佢，跟住都唔知發生乜事，就咁多嘢喇！」

之前蘭子提過家賊難防，被問到係咩意思？佢笑一笑然後話︰「我唔想將呢件事對號入座，有好多嘢其實唔止我同埋朋友，做咗一啲娛樂大家嘅事，呢樣嘢牽涉有啲公司內部嘅事，如果有啲嘢講得實，就係誹謗，所以要支持我講嘅嘢係真實呢，我就要攞公司嘅嘢出嚟，公司嘢攤大同大家講，我覺得冇必要。」

蘭子仲透露畀咗警告信對方，佢續說︰「公司方面出咗一封警告信畀對方，第一，唔好亂講嘢，第二，我亦知會咗律師，因為好多嘢指明道姓去講啲嘢，係誹謗的話，呢方面揾專業人士去搞喇！」

不過，蘭子因為呢件事，又有得着，佢話︰「另一方面我要多謝佢，傳媒朋友好耐冇揾我，我覺得飄飄然，佢做就機會，畀我宣傳番我做電台同專欄，佢成就我機會，我多謝佢。」

當問到蘭子，對方爆佢好似「利太」嘅身份？蘭子就話︰「其實一路以嚟，呢個圈有好多呢啲新聞是是非非，真真假假，即係响街度你撞到啲人，你以為你咩，你會唔會同佢逐樣去回應、回敬佢，唔會呀嗎，所以我對呢樣嘢，即係點講，唔會回應囉！之前我都唔會回應。」

蘭子又提到最怕件事令阿媽擔心，蘭子話︰「喺呢件事度，點解有啲人對號入座，搞到咁大龍鳳出嚟，平時默默支持我嘅朋友，都好擔心我，驚我畀人蝦。我要好多謝佢哋，最緊要係惹啲咁事，我阿媽唔係好睇新聞，但驚人哋話佢知，老人家身體唔好，我係最擔心，夠啦！唔好搞到其他人。」

蘭子又提到自己就快踏入50歲大關，將會係番呢間酒店嘅餐廳搞生日party，「我都下個月就50大關，有位高人指點我，要搞大生日請多啲人，要60人以上。我一向得罪人多稱呼人少，60人好驚囉，600個仇人就容易啫。好好彩60人之餘，原來有好多人我好想請，可能會請漏，朋友不斷話要幫我搞生日，梁思浩仲話要係節目度搞到好似台慶咁，呢個福氣。我會喺之前佢（指Crystal）做嘢嘅酒店度搞生日，（想證明你有好多朋友？）同埋間餐廳係佢老闆開，如有咩問題都唔會喺呢間餐廳度做任何嘢。」

精選娛聞，喺晒《娛果》
http://fb.com/appledailyent