錢唔係萬能，冇錢就搞乜都冇可能。元旦遊行唔少團體順便籌募經費，八方有個朋友當日幫襯社區組織協會（SOCO）買咗幾張抽獎券，返到屋企睇吓啲獎品，赫然發現頭、二、三同五獎都係由大劉捐出，真係諗佢唔到。
八方問番SOCO幹事施麗珊，佢話其實幾年前大劉已經捐過錢畀啲貧窮兒童，當時SOCO開記者會，搵咗啲住板間房嘅小朋友出嚟講吓苦況，冇耐大劉就搵人主動聯絡佢哋，話想捐助呢啲小朋友讀書等方面嘅開支。今次SOCO賣慈善獎券搞抽獎籌募經費，四出搵人贊助獎品，諗到搵番阿劉生幫手，大劉方面冇托手踭，問佢哋要幾多，佢哋都唔敢要求咁多，只係嗌話要兩萬蚊。

冇托手踭爽快應承

大劉方面爽快應承，由劉鑾雄慈善基金贊助兩皮嘢，包括萬五蚊大劉細佬劉鑾鴻（細劉）旗下嘅崇光百貨購物禮券、價值三千大元嘅數碼相機同價錢兩千蚊嘅音響器材。SOCO仲錢盡其用，將崇光禮券分拆成頭獎一萬蚊同二獎五千蚊，即係有成四份獎品都係大劉嘅慈善基金捐出。至於四獎就係新渡輪嘅澳門船飛四張。比社民連獎券抽獎，頭獎只係毓民送出嘅價值$3,399手提電腦一部，SOCO嘅獎品名單都算幾得體。

招募義工幫手賣旗

大劉雖然講過話自己「錢唔係多」，但兩萬蚊對佢嚟講真係濕濕碎，甚至可以講話根本唔係錢，唔夠紅顏知己甘比買個Birkin袋隻手挽，更加唔夠買安迪華荷幅《毛澤東》上面毛澤東條眉毛，但難得大劉對香港弱勢社群咁有心，都算係難得囉。
雖然有大劉捐助，但SOCO未來仍然要為錢煩惱，今年4月7日將會賣旗籌款。SOCO另一個幹事吳衞東話，嗰日係星期三，雖然啲學校好似會放復活節假，但係考試季節，驚搵唔到足夠義工幫手，呼籲有興趣幫手嘅各界朋友，可以打電話（27139165）或上佢哋嘅網頁聯絡SOCO。

mailto:[email protected]