卸任在職的特首梁振英，獲贈安慰獎轉入領導人大舞台，涉及的UGL事件是否就此一筆勾銷？「香港人對新特首係有個期望，有啲事覺得唔妥嘅，種種迹象顯示係有問題而不獲解答嘅，somehow係要有個了斷，公公正正咁解決！」自由黨榮譽主席周梁淑怡認為UGL事件懸疑未解，梁透過周浩鼎修改立法會立件更屬「旁門左道」，港人極關注廉署有否客觀及公正的調查，「就算佢（梁）落咗任，個case都未完，咪一路查囉！」

記者　許偉賢

周梁曾經在梁振英被揭私通民建聯周浩鼎修改立法會專責委員會文件後，越洋透過Facebook發文反問：「你既然說自己清白，哪還怕什麼？」她接受訪問時直指，作為特首沒理由不知道行政與立法，各有功能，「佢（梁）係唔可以叫啲議員『你幫我做啲乜』㗎嘛」，尤其被調查者正是梁振英本人，更應避嫌，指梁有權正式去信委員會表達意見，「唔到你旁門左道咁影響任何一個調查委員會成員。」她同時指周浩鼎堅持無隱暪，顯示對委員會工作誤解極深，「你（周）做副主席係代表緊成個委員會，唔係代表緊你個人。」

周梁認為，UGL事件關鍵之處是為何梁振英堅持不申報；問及梁不時指收取的5千萬，該協議為上任前簽定因此毋須申報，周梁反駁指梁收錢時間卻是出任特首後，而且條文中有條款延續他對UGL公司的義務，「即係如果要幫UGL做啲嘢係上任特首後，咁點解唔申報呢？如果你有合理辯解，公眾唔係唔識分道理嘅！」

梁振英不時指民主派跟進UGL是政治炒作，周梁卻指市民確實對此事，且事件涉及公職人員有否申報，屬大件事而非小事，「你越係唔答，香港人心裡面就有條刺，點解唔答呢？」93年曾於立法局提出以特權法成立專責委員會調查前廉署執行處副處長徐家傑被解僱風波，回歸前亦曾擔任專責委員會主席調查前入境處處長梁銘彥離職事件的周梁更指，現時立法會要成立專責委員會較以前艱難，「家似乎差唔多掂到高官，就唔慌旨意過到，都唔係議事論事。」

雖然已貴為國家領導人級別的政協副主席梁振英，反覆稱中央滿意其對UGL案的解釋，周梁直言不清楚他向中央報告的內容，「如果好簡單咁已經說服到中央，咁佢叻囉」，但認為公眾是關注他作為公職人員有否申報，「無論煲呔，許仕仁甚至長毛，都受管制，就算你係特首都唔可以喺法例之上，作為特首更加whiter than white啦」，重點也是市民最想知道：「點解你都唔申報呢？」