車淑梅2002年《舊日的足跡》節目曾訪問黃霑，當時黃霑指早年在華娃懷有三女宇詩時，自己投向林燕妮懷抱，結果被千夫所指，他在填寫《問我》一曲歌詞時，特別抒發當年心情同感受，1990年獲港台頒發「金針獎」時，公開向已經分手的林燕妮示愛，自言這一生不可能再愛另一個女人愛得那麼深，其後林燕妮接受車淑梅訪問稱恨黃霑14年來從未在領奬台上向她致謝，分手後，更度過十年「不能投稿」的日子。

資深DJ車淑梅接受《蘋果》時說：「難過嘅，一代才女代表，好似一個完結咁，諗起林燕妮就會諗起香噴噴、粉紅色，好溫柔聲線，着衫永遠好配合，用咗一啲時間先出嚟同大家見面，一個好認真嘅人。啲朋友講起林燕妮梗係會講霑叔，講佢感情世界，但我覺得佢有另外一個好值得我哋欣賞地方，係重視親情。好多時私下同佢傾偈，佢都掛住佢細佬妹，掛住佢哋點解咁早離開。有啲人都會話點解佢屋企咁多人生病，突然間走，如果係普通人嘅話，會係好大打擊，一個又一個打擊，但對於林燕妮嚟講，佢好堅強，佢可以去面對，唔會俾所謂嘅命運推倒。」

車淑梅指2011年曾傳她有癌症：「我訪問佢嘅時候，佢話冇嘅，後來佢都話如果我有嘅話，我都會堅強，活到醫學上唔能夠治療嘅時候，我先至冇辦法，如果唔係有機會，我都會去爭取、去生存，佢呢種精神係好值得我哋去欣賞同學習。」

此外，林燕妮日前因病離世，無綫電視安排特備節目ㄍ懷念林燕妮 向世界出發》於今日(5日)深夜1時至2時35分播出，悼念香江才女。