都話港股好波動而唔係好勁，前晚花旗升少少，港股昨日朝早升過千點，但好快又俾人質番轉頭，期指收市仲要倒跌，恒指雖然話硬淨啲，升幅都係「水瓜打狗」，唔見一大截，只有百零點升幅，不過成交就好大，接近1170億元，睇番個市先抽高，中段橫行，午市插落，忍唔住追貨嘅股民又中伏，一個唔覺意花旗昨晚跌多啲，今日港股裂口插落，都唔知點算。
𠵱家個市波動得咁厲害，少啲心血都真係唔敢入市，短線炒賣係刀鋒舔血，入市之前一定要問自己如果個市掉轉頭，自己會唔會嚴守止蝕，如果做唔到，就最好忍吓手嘞。

講番個市，中咗昨日俊樺講嘅第2個版本，即係上試22300掉頭回落，如果100日線都穿埋，就Noeyesee，到時記緊要跳車。
財險C輪9586：中財險（2328）昨收9.23元，股價升破10日同20日線之後升過上9.90元，收市企穩喺兩條平均線上面，技術上可以上試10.50元，可以買啲財險C輪9586短炒，昨收3.28元，有效槓桿率2.6倍，正股升上10.50元，9586應該喺4.50元嗰頭，正股跌穿8.70元止蝕。