綜合市場消息，內地生活資訊及外賣餐點平台美團點評，將於本月7日至12日公開招股，而大陸火鍋品牌「海底撈」就緊接在12日至17日招股。有券商指「孖展返唔切，只可二揀一」，又說目前海底撈獲較多客戶查詢。

耀才證劵﹙1428﹚ 行政總裁許繹彬表示，「去年唔抽新股好大罪」，但現時形勢有變，「自平安好醫生（1833）上市後，股價每況愈下，其他新經濟股都強差人意，小米（1810）更加唔使講，投資者已冷落新經濟股份，依家美團又係嗰啲嘢，又無業績支持，仲講咩（故事）呀？佢有馬化騰？易鑫（2858）都瓜咗啦！呢個光環已經唔可以照得太多人！」

他續指，抽新股無錢賺，投資者已經卻步，加上孖展利息貴，股市走下坡，「老實講，如果認購期間，中美之間發生乜事，個市氣氛差，我抽新股，鎖（資金）7至10日都幾煎熬。」若然要在美團和海底撈二選其一，他說海底撈始終較好，至少有盈利，但提醒投資者不可以和去年易鑫、閱文（772）、眾安（6060）（首日表現）作比較，同時建議依然想認購的客戶，可用現金小注投資。

茂宸金融期貨部第一副總裁丁世民同樣睇淡新股行情，主要是股市未能重上28000點，加上半新股表現差，直指抽新股熱潮已減退，又指客戶已轉向審慎，「睇番PE、PB、基本面，依家啲客都問晒呢啲先決定幾多、或者抽唔抽」，如果考慮這一點，同樣認為有盈利的海底撈稍勝一籌。

陸續有新股集資，惟未見對港匯有大影響，港匯由早上7.8485水平回落至7.8496水平，上海商業銀行研究部主管林俊泓指，港匯偏弱主要由股市主導，即使將會有多隻焦點新股集資，港匯至本月中，都會在7.848至7.85窄幅上落。

渣打亞洲外匯策略師張敬勤指，銀行體系結餘持續下跌，加上9月底美國議息，及季結因素，港元拆息上升趨勢持續，至於1個月銀行同業拆息是否可超越6月2.125厘水平，就視乎新股認購情況。

記者:黃珮琳