由香港本土Miss Mo毛孟靜、人民力量慢必陳志全、朱凱廸同街工梁耀忠早前成立的議會陣線，噚日下午請嚟一班議員助理同傳媒搞聖誕派對。由於梁耀忠一早離港去旅行，所以玩遊戲時就變成「兩王一后」大格鬥。

Miss Mo阿廸罰食百力滋

問答環節最搞笑莫過於問到議會陣線成立日期，只有阿廸答啱係11月16號，令到當日主持記招嘅Miss Mo大嗌：「我死囉！嗰日係我揀㖭啊！」現場傳來陣陣爆笑。最終慢必答啱最多題勝出，得分第二嘅阿廸同包尾嘅Miss Mo就要接受議助大懲罰，點知議助要佢哋畀利是又或者兩人同食一條百力滋！呢個懲罰嚇到兩人呆咗呆，更要搞笑離場商議，最終決定「一人食一支百力滋」，再每個議辦派多封利是。贏咗嘅慢必亦攞出拍港版《丹麥女孩》嘅1,000元片酬，畀議助做獎品，𠱁得議助好開心。呢個派對仲好環保，除咗每人要自備餐具，連禮物都只係用廢紙同唔用嘅標語包裝。