【智能眼鏡】華為夥拍韓國潮牌賣型格 Bose定價平兼可換鏡片
蘋果日報 2019/09/27 00:03
華為Bose智能眼鏡gentle monster
華為夥拍韓國人氣眼鏡品牌Gentle Monster推出智能眼鏡，充電時要靠白色的眼鏡盒。
不知是巧合或專登，華為及Bose都幾乎同時間在香港發售公佈了數個月的智能眼鏡，而且功能同樣主打內置藍牙耳機，可算是正面對撼。
華為跟韓國人氣眼鏡品牌Gentle Monster合作推出Huawei X Gentle Monster Eyewear智能眼鏡，外表同一副Gentle Monster的太陽眼鏡無太大分別，眼鏡上亦唔見華為招牌，只得一條短紅線取代；另提供Jack Bye同East Moon兩款經典鏡框設計，鏡片都係Gentle Monster用開的蔡司鏡，不過在兩邊眼鏡臂都有感應器同小喇叭，藍牙接駁手機後就可當成藍牙耳機使用，聽歌之外亦可講電話。
不過兩款鏡框大小都係固定，眼鏡臂連接位無彈性，未必每一個人的面形，記者試時就覺得過窄。輕敲右眼鏡臂會暫停／播放，亦可自訂左右眼鏡臂的功能。亦由於同一道理，兩邊眼鏡臂上的小型喇叭亦未必配合大家的耳朵位置，記者試聽覺得音量是偏低，即使調到音量最高亦未算太大聲，好在漏音問題不太大，但音色未算太出色。智能眼鏡點充電？一定要靠專用眼鏡盒先至得，透過NFC無線充電，充電後一次過可播歌2.5小時。Huawei X Gentle Monster Eyewear香港定價$3,050。Gentle Monster普通Jack Bye及East Moon款太陽眼鏡價錢都係約$1,600，千多元差額當買個無線耳機，值不值得則見仁見智。
Bose眼鏡就沒有品牌聯乘，暫只提供「方款」設計，定價較平，只需$1,699；另只須多付$169或$249，即可購入漸變藍（非偏光）及鏡面銀（偏光）鏡片取代原來深色鏡片。Bose眼鏡內置藍牙耳機，微型發聲單元及充電位都設於眼鏡臂，換來是眼鏡臂變得較粗，觀感就真是差啲。不過Bose眼鏡有項特別功能，就是兼容Bose AR系統，透過9軸運動感應器及手機GPS了解家位置及視線內景物，然後用語音作提示。
售價：$3,050（Huawei X Gentle Monster Eyewear）、$1,699（Bose眼鏡）
記者、部份攝影：布偉倫
編輯：鄒仲安
編輯：鄒仲安
利用藍牙接駁手機及智能眼鏡，連接時都算得幾穩定。
眼鏡臂招牌位置是觸控區，敲打時會有不同功能；另值得留意的是眼鏡臂上並無華為名稱，只用了一條短紅線取代。
兩邊眼鏡臂下方都設有小型喇叭，音量未夠強，但亦無明顯漏聲問題。
Bose眼鏡對應Bose AR功能，惟眼鏡臂較粗。