巴度來港時日不長但迅速企穩陣腳，雖說有運得到沈集成賞識關照，亦要本身交得到成績，令練馬師、馬主有信心。剛周三晚巴度贏加頭罩馬「威信」，直路攞位機靈，合法偷了雷神「靚紫荊」跑線，一來一回就係贏輸關鍵所在。

今次(17日)沙田賽事，巴度新座騎明顯增多，但始終拍沈集成較令人安心，頭場四班1000米「金湶德」上仗初出跑谷草1200米已捧成大熱，未跑過卻如此大信心，反映自視高，結果大包尾而回，賽後巴度解釋或可能初出稚嫩！但變數係今仗除脷帶、轉場、換路程，突然交出水準亦毋須解釋，因以上三種轉變，已等於備定案。

第七場四班1600米，「開心日子」初出1200米得第三後，接住兩戰加程跑1400米雖不上名，但走勢卻越有睇頭，尤其剛仗沿欄追回不少失地，今次有四班1400米不報，反而加眼罩跑冇根據的1600米，部署與「威信」熟口熟面，跳程可現真身。