香港家陣好多企業學鬼佬機構，男性員工都可以有幾日侍產假，好似恒隆地產（101）執董吳士元一年前已經喺公司推行呢項福利。四叔嘅恒地（012）就喺下個月開始，總部嘅男員工享有3日侍產假，華華不期然諗到，李家二少上年做咗老竇，今年就有呢項德政，會唔會係二少效應呢呵？
恒地噚日出咗內部通告，內容係由8月1號開始，總部嘅員工會率先推行侍產假，所有過咗3個月試用期嘅男員工，都可以喺太太分娩後四個禮拜內，攞3日受薪假期，連續放或者分開3日放都冇問題，最緊要方便啲爸爸可以照顧產後嘅太太及初生嬰兒。
華華收到料，恒地旗下四間物業管理公司都會推行呢項福利，不過未必同期推出，而煤氣（003）都好大機會跟住實行，但家陣仲研究緊，要同其他福利配合，所以未知幾時推出，至於美麗華酒店（071）就未有消息會跟隨。

煤氣好大機會跟隨

據知呢項德政由高層發落，咁係人都知，李家二少李家誠上年做咗老竇，佢位靚太徐子淇生咗個李家金叵羅晞彤，廿四孝老公李家誠即時做埋廿四孝老竇，停工陪愛妻入院，生產時亦喺太太身邊，除咗搵十二人嘅「陪月兵團」陪愛妻，佢自己都有落手落腳湊囡囡，仲試過親自餵奶。
咁俗語有云，為人父母者，方知父母心，李家誠既係恒地副主席兼執董，做咗老竇先體會到為父嘅辛苦，推己及人推行侍產假都唔出奇。
四叔曾叮囑乖仔及新抱要為李家開枝散葉，靚太子淇都講過：「願意為李家六年抱四……肥多100磅都冇所謂。」二少若然真係咁勤力，恒地呢個新福利，佢本人最用得着囉。
電郵：mailto:[email protected]