毅然離開打工9年嘅大台，高鈞賢重獲自由身將近一個月，今日佢去到商台接受訪問時，坦言發現出面有好多平台發展，就好似今日就會見一位導演傾下接拍內地電影，之後11月會幫有線拍旅遊節目，nowTV都洽談當中。

最古怪離奇仲係亞視，原來亞視都睇中佢，想搵佢擔任《亞洲先生》選舉評判，不過佢就覺得有啲怪而婉拒。

過去差不多一個月，佢指收入跟以往差不多，佢話:「呢個月我放咗七成時間做唔同訪問，其餘時間接工作，收入都同以往差唔多，我希望接o既工作有一定水準，唔想話乜都接。」高鈞賢又話佢嘅目標係想向內地發展，現時港台都有經理人聯絡佢傾合作。

講到羅蘭姐上節目收旅行插蘇代替騷錢？高鈞賢話:「我未收過插蘇，若果畀我揀，我都想收禮物多過騷錢，回報率可能高啲，加上我好多時都收金，若果有金插蘇就好。」