現年47歲嘅韓國男星馬東石因賣座韓片《屍殺列車》而爆紅，隨後邀約不斷，唔少電影都有其身影，佢主演嘅《與神同行：終極審判》、《神臂大叔》、《犯罪都市》等電影都有喺香港上映。而馬東石夥拍31歲男星金英光主演嘅新片《與鬼同行：大叔追兇》，將於下周四(22號)喺香港上映，兩位主演特地拍片晒廣東話同港迷打招呼，呼籲粉絲入場支持。

《與鬼同行：大叔追兇》講述熱血警察太振(金英光飾)喺一次意外中靈魂出竅，遇上柔道館長長壽(馬東石飾)，兩人合力追兇嘅故事。電影公司同時公開咗《與鬼同行：大叔追兇》預告作宣傳，片中可見馬東石雖然飾演柔道館長，但一啲正義感都冇，對其他人都漠不關心，唔知點解見到金英光嘅靈魂，但之後佢慢慢改變，更幫助金英光解救其女友(李俞英飾)，繼續上演連場動作戲。

精選韓流，喺晒《娛果》
http://fb.com/appledailyent