著名影星渡邊謙爆出有小三醜聞後導致好男人形象破產，更與其53歲太太南果步處於冷靜期，據雜誌《女性自身》指，月初南果步出席主演NHK日劇《定年女子》慶功宴時，坦言因身心俱疲暴瘦近17磅，左手無名指更冇戴婚戒，繼而被指已對呢段婚姻死晒心。

今年3月，渡邊謙爆出婚外情消息，南果步原本擔心情緒低落有意辭演，但因合作演員檔期都已敲定，佢唔想影響劇組拍攝，最後都係如期演出。劇組人員表示，南果步在拍戲期間經常心情低落，一個人面壁發呆，見者心酸。南果步年前因罹患乳癌，加上老公外遇嘅雙重打擊，令佢持續暴瘦僅剩得88磅，十足紙板人。渡邊謙上月中開完記者會為婚外情公開致歉後，已飛往美國開工，傳佢向身邊友人透露有離婚打算，希望恢單後重新出發。由於渡邊謙落實明年演出NHK大河劇《西鄉殿》，有消息指佢同NHK已達成協議，劇集播出期間唔會離婚。

其實，南果步喺《定年女子》中角色諷刺地講佢因丈夫偷食離婚收場，全劇8集嘅《定年女子》將會喺星期日播放第6集，劇情講到南果步飾演嘅麻子，因為女兒生咗小朋友榮升嫲嫲，仲同27歲型男町田啟太有感情線，劇中町田啟太對佢相當傾慕，要求南果步用三個月時間考慮吓呢段母子戀，劇中二人仲有唔少親密互動。