執輸行頭慘過敗家，仲有半個月先到12月，個個商場都「滾水淥腳」做聖誕kickoff，中環IFC商場嘅聖誕布置前日正式開幕，係一個好有懷舊色彩嘅聖誕村，仲有棵35呎高嘅聖誕樹，樹頂用咗真金裝飾，蘭西仲未去現場睇過，但齋睇相都覺得好吸引。
成個布置使咗500萬，比去年多咗五至七成。點解使多咁多？IFC出名高檔係人都知，但加碼嘅主要原因，相信係租金收入升到嘭嘭聲，聽講今年續租戶，有啲加租超過1倍，賺咁多，唔搞到個場好好睇睇，租戶點肯放過佢哋呢？