上次提到馬會實施新安排,要求馬主填寫表格,講明諗住循乜渠道引入馬匹。實情係入紙抽馬時唔需要填表,只係要求中咗籤嘅馬主提交資料。喺呢度澄清更正,希望唔會為準備抽馬嘅馬主同團體,帶嚟不必要困擾。
養馬嘅籤一向僧多粥少,一直盛傳馬會有一份馬主黑名單,被列入黑名單人士,部份係被馬會保安部查到,例如曾經涉及賭外圍馬。馬會從來唔認有黑名單,但有啲馬主長期唔中籤,大概都估到乜事。
馬會一直嚴打檯底馬,私下撇除某類人士做馬主,喺維持香港馬會形象同廉潔方面,確係無可厚非。不過,由於黑名單並冇公開,唔排除有冤枉咗無辜好人嘅情況。
再講,就算保安部神通廣大,可以查到香港馬主,對於內地馬主,保安部又係咪真係可以鉅細無遺咁起到底呢?呢套準則似乎對香港馬主特別苛刻,未做到公平公正。
某啲有錢有社會地位嘅人,又有興趣又熱衷養馬,偏偏唔明點解長年中唔到籤。據知,部份曾被列入黑名單人士,經保安部深入調查後,最終都還番清白。換句話講,今時今日馬會已經唔係以前咁封閉,若然有馬主抽極都唔中籤,懷疑自己被列入黑名單,不妨主動搵馬會查詢,當面提供證據解釋,等保安部調查清楚,中籤就指日可待。
阿Joe