日本萬人迷木村拓哉上年主演嘅《律政英雄》電影版喺日本大收旺場，令一班尊尼事務所師兄弟今年都一窩蜂搶攻影壇。由組合V6成員岡田准一夥拍女星宮崎葵嘅電影《向著陰天盛放》，將打頭陣喺呢個月26號上映，之後嵐成員松本潤、SMAP成員草弓剪剛以及中居正廣等都有電影上畫。不過，當中以KinKiKids成員堂本光一以及首度孭飛拍電影嘅NEWS成員山下智久，俾網友睇死票房慘淡。

彈演技水皮

堂本光一主演嘅《壽司王子》電影版將喺4月19號上映，雖然電影專程到紐約拍外景，但早前播出嘅電視版收視只得單位數字，搞到網友KU話：「《壽司王子》收視已經咁差，再拍電影版簡直凶多吉少。」
至於前年由山下智久演出嘅日劇《黑鷺》收視唔錯，所以決定搬上大銀幕喺3月8號上映，山下飾演專呃騙子嘅騙子。網友AIKO就話：「山下演技太水皮，唔需要畀錢去戲院睇。」網友BYEBYE就話：「山下嘅演技一啲進步都冇。」
版主：網盜王尊尼Deep
本欄逢周一至五刊出

網址： http://idolgravuredvd.seesaa.net/article/76835734.html