Big 6球隊之中,曼聯、曼城,同埋熱刺最多球員被徵召,同樣有14個,以飛行距離計,紅魔就好過利物浦少少,加埋要飛87,473公里。紅魔絕對主力葡萄牙中場般奴費南迪斯(B費),最初曾經因為葡國一直喺英國政府「紅色名單」入面,如果回國再返英國就起碼要隔離10日,領隊蘇斯克查當然唔制。不過,因為葡萄牙主場對阿塞拜疆一戰改喺意大利都靈踢,所以最後都成功入到國家隊。至於曼城、阿仙奴、熱刺,車路士嘅飛行距離都係70,000至80,000之間,家吓聯賽榜首越帶越開嘅曼城反而仲係今次國際賽入面飛行距離最少嘅Big 6球隊,對於其他球隊嚟講絕對唔係好事。