由韓片《饑渴誘罪》金玉彬夥拍申河均及盛駿主演嘅韓國電影《惡女》後日喺香港上映。電影講述金玉彬自小被申河均栽培成冷血殺手，但金玉彬卻被韓國情報局指揮官逼佢當十年刺殺特務，直到金玉彬遇到盛駿，就喺佢婚禮當天，金玉彬竟接到最令佢意想不到嘅殺人指令……

現年30歲嘅金玉彬飾演超級打女，由一開場就打到結尾，真係少啲體力都唔得。金玉彬日前受訪時就坦言自己從少就對動作片好感興趣，當讀到劇本有呢啲打鬥場面時，佢就覺得唔參演就會後悔一世，佢坦言喺拍攝時好易受傷兼流血，又自爆因為拍動作戲時太用力，加上成日咬緊牙關，所以連臉都好似長咗肌肉，身邊工作人員都笑佢變醜。

喺片中金玉彬自細冇咗童年，細個就被訓練成殺手，另一方面嘅佢又嚮往愛情，金玉彬話：「角色情緒更有少女嘅感覺，會因為愛情而心痛，喺殺人時又好強悍，係我演過嘅角色中，性格最矛盾嘅一個。」而喺片中金玉彬嘅身份仲係一個媽媽，雖然現實生活中佢就冇小朋友，但為了演繹那種母愛，佢就不斷問身邊有小朋友嘅人，佢話：「我好似忽略咗有小朋友對感情嘅重要性，以前我從冇諗過母愛嘅事。」

金玉彬提到喺電影圈中女演員成日好似變成男演員嘅影子一樣，佢話：「我總覺得女演員能演嘅角色有唔少限制，覺得好可惜。明明可以發揮，創造更多唔同人物，為甚麼總感覺係複製前人呢？實在可惜。所以今次拍攝《惡女》我咬緊牙關，擔心動作做得不夠好，會聽到：『睇吓，女人果然唔得、真係容易受傷』嘅說話，所以今次一定要做得好。」