明年11月嘅區議會選舉仲有不足一年半就開打，各大政黨早已密鑼緊鼓，派人落區熱身，其中民主派地區實力最強嘅民主黨，今日就介紹10個有志從事地區工作嘅年輕人畀傳媒認識，其中一半人都將會抗擊民建聯嘅「老海鮮」。

五位將與民建聯對陣嘅民主黨社區主任，包括仲係讀緊大學嘅「小花」林子琼、蘇逸恒、麥瑞淇、郭㙟豐、鄧惠強，五人嘅對手好有機會係民建聯喺地區上盤琚多年嘅老手。林子琼新學年升讀大學四年級，年紀輕輕嘅佢話明年一定要成功畢業，以迎戰明年11月「打大佬」嘅戰役。

另一位為不少網民認識嘅「小花」梁翊婷（Edith），盛傳會喺觀塘區與經常報稱獨立嘅蘇麗珍對陣。另一個同樣報稱獨立、但其實與民建聯關係極密切嘅油尖旺區議員鄧銘心，民主黨將派出重點栽培嘅年輕人朱子洛對陣。

除咗民建聯之外，其中一場重點復仇戰戲碼，就係上屆民主黨元老何俊仁敗於西環契仔何君堯嘅選區，民主黨或派出港大法律碩士生、喺中大經濟系畢業嘅盧俊宇抗擊何君堯。