繼今早現身過影視娛樂博覽嘅古天樂，喺今日下午時份再度登場，今次佢聯同吳鎮宇、張智霖（Chilam）、胡杏兒、松岡李那等現身，宣傳兩套新劇同3套新片。

古仔同Chilam及杏兒為《暗黑者》宣傳，執導嘅邱禮濤介紹時話係改編自小說，劇情好複雜，觀眾入場時要用腦睇，不過佢話會拍得好清楚俾觀眾。

問到古仔喺片中係咪好多特技化妝，會唔會好辛苦？佢話「係呀」，仲笑言：「個個化妝都係我化嘅。」而佢亦話自己好多造型。鎮宇則爆杏兒個角色，基本上可以喺綠布幕時拍晒都OK，搞到杏兒急急話：「唔得，難得有咁多型男一齊合作，梗係要多啲時間對住。」杏兒仲補充話自己係第一次同古仔、周柏豪及邱禮濤導演合作。

到訪問時，杏兒同Chilam一齊受訪，Chilam話下個月開始拍：「日日都諗住個角色，唔想放過呢個好劇本，所以好認真咁去揣摩，亦都為咗拍攝，有去睇番原著小說，好引人入勝，所以好期待個劇本。」Chilam話自己喺戲中做差人，要搵番個大反派出嚟，仲有個死咗嘅女友，就係杏兒個角色，Chilam仲預告，杏兒每次出場都用好特別嘅方式，每次出現都唔簡單。

問到杏兒係咪慘死？佢話：「係，故事係因為女仔死咗引起嘅故事，兩個會有感情戲。」杏兒話因為自己個角色死，令到Chilam耿耿於懷，變得好瘋狂。

咁Chilam怕唔怕太投入角色而走火入魔？Chilam話：「一定會好投入角色，但希望唔好走火入魔。」另外，提到大台公佈話會再拍《衝上雲霄》，問佢哋有冇興趣？Chilam話：「唔知喎，冇搵我傾過，等我陣間問吓鎮宇先。」

精選娛聞，喺晒《娛果》
http://fb.com/appledailyent